భీమ శతకం

భీమ శతకం
(2వ విడత)
రచన: ఆచార్య వి. యల్. యస్. భీమశంకరం.

11. పట్టి పట్టి రోజు పైసైన జమ చేయ,
పెరిగి పెరిగి పెద్ద పెన్నిధౌను -
కూడి కూడి ఇసుక కొండగా మారదా!
విమల సుగుణ ధామ వేము భీమ.

12. నిద్ర గూడ వీడి నిరతమ్ము శ్రమియించి
ధనము కూడ బెట్టు మనుజు డెపుడు
నిధులు కూడి గూడ నిద్రించలేడురా -
విమల సుగుణ ధామ వేము భీమ!

13. ధనము కూడ బెట్ట తనువుతో ప్రాణమ్ము
పణము పెట్ట రాదు పవలు రేయి -
వ్యక్తి జీవితమ్ము వ్యాపారమా ఏమి ?
విమల సుగుణ ధామ వేము భీమ.

14. హాని జరుగు నేమొ అనుకుని మానకు
బ్రదుకు బాట యందు కదలు నపుడు -
మెడను సాచ కుండ మెదలునే తాబేలు?
విమల సుగుణ ధామ వేము భీమ.

15. చిక్కు లున్న పట్ల చీవాట్లతో గాక,
మంచి మాట తోడ మాన్ప వలయు -
అగ్ని నార్ప బోయి ఆజ్యంబు పోతురా!
విమల సుగుణ ధామ వేము భీమ.
        
16. పనులు రానివారు పని రాని వారితో
ఊసు లాడు చుందు రుబుసు పోక -
పనులు చేయు తరిని పలుకాడ వ్యవథేది?
విమల సుగుణ ధామ వేము భీమ.

17. యుద్ధ మందు తగులు పెద్ద దెబ్బలు గూడ
మాసి పోవు కాల మహిమ వలన -
మాసి పోని వెపుడు మన వారి దెప్పులే!
విమల సుగుణ ధామ వేము భీమ.

18. పప్పు తోడ బువ్వ చప్పగా నుండును
ఆవకాయ నంజ నద్భుతంబు -
బ్రదుకు లోని కొన్ని బాధలు తీపిరా!
విమల సుగుణ ధామ వేము భీమ.

19. పనిని  చేరు నాడె ‘బాసు’కావలె ననుచు
చింత పడక పనులు చేయ వలెను,
‘రోము’ కట్టి నారె రొజులో తలపోయ!
విమల సుగుణ ధామ వేము భీమ!

20. పృథ్విలోన నెంత పెద్ద విద్యైనను
పట్టు  పట్టి  నేర్వ పవలు రేయి
కష్టమేమి కాక కరతలామలకమౌ!
విమల సుగుణ ధామ వేము భీమ!

సిలికానాంధ్ర వారి November, 2011 సుజనరంజని e-magazine కవితా స్రవంతి శీర్షికలొ ప్రచురితము.